നെരൂദ-പ്രണയകവിത

ഓർക്കുന്നുവോ:
ഒരു കിളിക്കുഞ്ഞിന്റെ ഹൃദയം
കൂട്ടിലിട്ടൊപ്പം കൊണ്ടുനടക്കുന്നവൾ നീ:
ചിറകിന്റെയും പാട്ടിന്റെയും സംവാദം;
അത്രയും വയലിനുകൾ,
ഉയർന്നു പറക്കുന്നവ, വെട്ടിത്തിളങ്ങുന്നവ.
വാരിയെടുക്കൂ, എനിക്കു വേണ്ടി വാരിയെടുക്കൂ,
ശബ്ദങ്ങളും രത്നക്കല്ലുകളും,
തീയിലും വായുവിലും അതു പെറുക്കിക്കെട്ടി
നിർമ്മലസംഗീതത്തിന്റെ അകമ്പടിയുമായി
നാം യാത്ര പോകും
പൊൻകട്ടകൾ കുത്തിയൊലിക്കുന്ന പുലരിയിലേക്ക്.
നമ്മുടെ പ്രണയം തുടിക്കട്ടെ
തണുപ്പത്തു ചെകിളയിളക്കുന്ന മത്സ്യം പോലെ. 
------------------------------------------------------------------

 വിവര്‍ത്തനം (വി.രവികുമാർ)